IPLની ચોંકાવનારી ટ્રેડ ડીલ લગભગ ફાઈનલ થવાની તૈયારીમાં

IPLની ચોંકાવનારી ટ્રેડ ડીલ લગભગ ફાઈનલ થવાની તૈયારીમાં

IPL 2027ની નવી સિઝન શરૂ થાય તે પહેલાં જ ક્રિકેટ જગતમાં એક મોટો ભૂકંપ આવ્યો છે. IPLના ઈતિહાસની સૌથી મોટી અને ચોંકાવનારી ટ્રેડ ડીલ લગભગ ફાઈનલ થવાની તૈયારીમાં છે. કેટલાક રિપોર્ટ્સ અનુસાર મુંબઈ ઇન્ડિયન્સ (MI)ના કેપ્ટન અને સ્ટાર ઓલરાઉન્ડર હાર્દિક પંડ્યા હવે પંજાબ કિંગ્સ (PBKS)માં જોડાવા જઈ રહ્યા છે, જ્યારે પંજાબનો સ્ટાર ફાસ્ટ બોલર અર્શદીપ સિંહ મુંબઈ ઇન્ડિયન્સની જર્સીમાં જોવા મળી શકે છે.

BCCIને સોંપાયા દસ્તાવેજો, બન્ને ખેલાડીઓની સંમતિ રિપોર્ટ્સ અને દાવા મુજબ, મુંબઈ ઇન્ડિયન્સ અને પંજાબ કિંગ્સ બંને ફ્રેન્ચાઈઝીએ આ ટ્રેડ ડીલને લઈને તમામ કાગળિયા અને દસ્તાવેજો તૈયાર કરીને બોર્ડ ઓફ કંટ્રોલ ફોર ક્રિકેટ ઇન ઇન્ડિયા (BCCI)ને સોંપી દીધા છે. સૌથી મહત્ત્વની વાત એ છે કે આ ઐતિહાસિક ટ્રેડ માટે હાર્દિક પંડ્યા અને અર્શદીપ સિંહ બંને ખેલાડીઓની સંમતિ પણ મળી ગઈ છે. હવે માત્ર BCCIની અંતિમ મંજૂરી અને સત્તાવાર જાહેરાતની જ રાહ જોવાઈ રહી છે. રિપોર્ટમાં એવો પણ દાવો કરવામાં આવ્યો છે કે અર્શદીપની સાથે વિકેટકીપર-બેટ્સમેન વિષ્ણુ વિનોદ પણ મુંબઈ ઇન્ડિયન્સનો હિસ્સો બની શકે છે.

મુંબઈમાં હાર્દિકની વાપસી રહી હતી વિવાદિત નોંધનીય છે કે, ગુજરાત ટાઇટન્સ (GT)ને પોતાની જ કેપ્ટન્સીમાં ડેબ્યૂ સિઝનમાં જ ચેમ્પિયન બનાવનાર હાર્દિક પંડ્યા જ્યારે 2024માં મુંબઈ ઇન્ડિયન્સના કેપ્ટન તરીકે પાછો ફર્યો ત્યારે પરિસ્થિતિ તેના પક્ષમાં રહી ન હતી. મુંબઈના ડ્રેસિંગ રૂમમાં જૂથબંધીના અહેવાલો અને મેદાન પર ચાહકોની નારાજગી (હૂટિંગ) સતત ચર્ચામાં રહી હતી.

ટીમનું પ્રદર્શન પણ સતત કથળી રહ્યું હતું, જેના પછી મુંબઈ ઇન્ડિયન્સ મેનેજમેન્ટે ટીમને ફરીથી સેટ કરવાનું મન બનાવી લીધું હતું.

KKR રેસમાં હતું, પણ પંજાબે મારી બાજી અગાઉ કોલકાતા નાઇટ રાઇડર્સ (KKR) હાર્દિકને ખરીદવાની રેસમાં સૌથી આગળ હોવાનું મનાતું હતું, પરંતુ પ્રીતિ ઝિન્ટાની પંજાબ કિંગ્સે બાજી મારીને મુંબઈ સાથે આ બ્લોકબસ્ટર ડીલ સાઈન કરી લીધી છે. આ ડીલ બંને ટીમો માટે ફાયદાકારક સાબિત થઈ શકે છે. અર્શદીપ સિંહ જેવા ઘાતક ફાસ્ટ બોલર અને ડેથ ઓવર સ્પેશિયાલિસ્ટને પોતાની ટીમમાં સામેલ કરીને મુંબઈ પોતાનું બોલિંગ આક્રમણ મજબૂત કરવા માંગે છે, જ્યારે પંજાબ કિંગ્સને હાર્દિકના રૂપમાં એક મેચ-વિનર ઓલરાઉન્ડર અને અનુભવી કેપ્ટન મળી ગયો છે.

રોહિત-હાર્દિક ડ્રામાનો અંત મુંબઈની ટીમમાં છેલ્લા કેટલાક સમયથી ખેલાડીઓ વચ્ચે અણબનાવના અહેવાલો પણ સામે આવતા રહ્યા હતા. ખાસ કરીને રોહિત શર્મા પાસેથી કેપ્ટન્સી છીનવીને હાર્દિકને આપ્યા બાદ બંને વચ્ચે મનદુઃખના સમાચારોએ ઘણી વાર જોર પકડ્યું હતું. હવે હાર્દિક પંડ્યાના પંજાબ જવાથી મુંબઈ ઇન્ડિયન્સમાં લાંબા સમયથી ચાલી રહેલા રોહિત-હાર્દિક ડ્રામાનો પણ અંત આવતો જોવા મળી રહ્યો છે. ફેન્સ હવે BCCIની સત્તાવાર જાહેરાતની આતુરતાથી રાહ જોઈ રહ્યા છે.